اسلام آباد(بيورو رپورٽ)چيف اليڪشن ڪمشنر سڪندر سلطان راجا جي صدارت هيٺ عام چونڊن بابت سنڌ سيڪريٽريٽ ۾ اهم اجلاس ٿيو. ان موقعي تي ميمبر اليڪشن ڪميشن سنڌ نثار دراني، ميمبر اليڪشن ڪميشن بلوچستان شاهه محمد جتوئي، ميمبر اليڪشن ڪميشن پنجاب بابر حسن ڀروانه، ميمبر اليڪشن ڪميشن خيبرپختونخواه جسٽس (ر) اڪرام الله خان، سيڪريٽري اليڪشن ڪميشن عمر حميد خان، صوبائي اليڪشن ڪمشنر سنڌ انور چوهاڻ ۽ ٻين شرڪت ڪئي. اجلاس ۾ چيف سيڪريٽري سنڌ ڊاڪٽر محمد فخر عالم ۽ آءِ جي سنڌ رفعت مختار، سيڪريٽري گهرو محمد اقبال ميمڻ، سيڪريٽري لوڪل گورنمينٽ، سيڪريٽري اطلاعات نديم الرحمان ميمڻ، چيئرمين پلاننگ بورڊ، سيڪريٽري فنانس ۽ ٻين عملدارن شرڪت ڪئي.چيف اليڪشن ڪمشنر سڪندر سلطان راجا چيو ته اليڪشن جي پرامن ۽ غيرجانبدار انعقاد لاءِ سمورا وسيلا ڪتب آندا وڃن، چونڊن ۾ لاپرواهي ڪندڙ آفيسرن ۽ عملي خلاف سخت ڪارروائي ڪئي ويندي. هن وڌيڪ چيو ته چونڊون آزاد، منصفاڻي ۽ غيرجانبدارانه انعقاد بهتر جمهوريت جو ضامن هوندو. اليڪشن ڪميشن عبوري صوبائي حڪومت کي هر ممڪن مدد فراهم ڪندي. ان کان علاوه سرڪاري ملازمن جي ڪنهن به قسم جي سياسي تعصب کي برداشت نه ڪيو ويندو ۽ جيڪڏهن اهڙي شڪايت ملي ته فوري ڪارروائي ڪئي ويندي.اجلاس دوران سيڪريٽري اليڪشن ڪميشن عام چونڊن جي تيارين جي حوالي سان بريفنگ ڏني، جنهن ۾ هن ووٽر لسٽن جي اپ ڊيٽ ٿيڻ ۽ ووٽرن جي رجسٽريشن بابت آگاهي ڏني. صوبائي اليڪشن ڪمشنر سنڌ اعجاز انور چوهاڻ اجلاس کي عام چونڊن جي تيارين جي حوالي سان هن وقت تائين ڪيل انتظامن تي بريفنگ ڏني ۽ ايندڙ قدمن جو جائزو ورتو.چيف اليڪشن ڪمشنر سنڌ جي ٻوڏ متاثر علائقن لاءِ خاص پلان تيار ڪرڻ جا به حڪم ڏئي ڇڏيا، هن وڌيڪ چيو ته اليڪشن کي صاف، شفاف ۽ منصفاڻي بڻائڻ لاءِ فوج ۽ رينجرز جي مدد پڻ ورتي ويندي، هن ان تي عمل جو يقين ڏياريو. حڪم. اجلاس ۾ صوبائي اليڪشن ڪمشنر ٻڌايو ته سنڌ ۾ 2 ڪروڙ 67 لک 83 هزار 254 رجسٽرڊ ووٽر پنهنجي ووٽ جو حق استعمال ڪندا. سنڌ ۾ قومي اسيمبلي جي 61 ۽ صوبائي اسيمبلي جي 130 سيٽن تي چونڊون ٿينديون، صوبي ۾ 19 هزار 236 پولنگ اسٽيشنون ٺاهيون وينديون. صوبي ۾ 4 هزار 430 انتهائي حساس ۽ 8 هزار 80 پولنگ اسٽيشنز کي حساس قرار ڏنو ويو آهي.اجلاس ۾ چيف سيڪريٽري سنڌ چيو ته سنڌ حڪومت عام چونڊون ڪرائڻ لاءِ اليڪشن ڪميشن کي مڪمل سهڪار فراهم ڪندي. هن وڌيڪ چيو ته صوبائي حڪومت اليڪشن ڪميشن جي حڪمن جي روشني ۾ 100 سيڪڙو ٽرانسفر پوسٽنگ تي عمل ڪري رهي آهي. هن وڌيڪ چيو ته پولنگ اسٽيشنن تي سمورن سهولتن جي فراهمي کي يقيني بڻايو ويندو. اجلاس ۾ آءِ جي سنڌ رفعت مختار چيو ته سنڌ پوليس پاران سڪيورٽي پلان تيار ڪيو ويو آهي. عام چونڊن ۾ 1 لک 10 هزار 334 پوليس اهلڪار سيڪيورٽي جا فرض سرانجام ڏيندا. ڪنهن به اڻ وڻندڙ واقعي جي صورت ۾ ڪوئڪ رسپانس فورس کي به الرٽ ڪيو ويندو ۽ اليڪشن جي پرامن انعقاد لاءِ ڪابه ڪسر نه ڪبي.
