ڪراچي (اسٽاف رپورٽر)پاڪستان پيپلز پارٽي (پي پي پي) ۽ جميعت علماءِ اسلام (جي يو آءِ ف) ۾ آئيني ترميم جي مسودي تي اتفاق ٿي ويو آهي.ڪراچي ۾ پ پ چيئرمين بلاول ڀٽو زرداري ۽ جي يو آءِ سربراهه مولانا فضل الرحمان گڏيل پريس ڪانفرنس ڪري آئيني ترميم جي مسودي تي اتفاق راءِ جي تصديق ڪئي.بلاول هائوس ڪراچي ۾ صحافين سان ڳالهائيندي مولانا فضل الرحمان چيو آهي ته آئيني ترميم جي مسودي تي اتفاق راءِ ۾ بلاول ڀٽو زرداري اهم ڪردار ادا ڪيو آهي.هن چيو ته بلاول ڀٽو زرداري سان آئيني ترميم جي معاملي تي سنجيده ڳالهه ٻولهه ٿي آهي.مولانا فضل الرحمان چيو ته ترميم جو پهريون مسودو ان ڏينهن به قبول نه ڪيو ويو ۽ هاڻي به ناهي، هو اسان جي سوچ کي سمجهي.هن چيو ته اڄ اسان کي سنجيدگي سان سوچڻو پوندو، جيڪڏهن ملڪ آهي، آئين ۽ پارليامينٽ آهي ته پوءِ ان لاءِ آواز اٿارڻو پوندو.جي يو آءِ سربراهه چيو ته مان سمجهان ٿو ته اسان جن تجويزن تي ڳالهه ٻولهه ڪري رهيا آهيون انهن کان ڳجهي ناهي، اسان پنهنجي تجويزن جو خاڪو ساڻس شيئر ڪيو هو. مولانا فضل الرحمان اهو به چيو ته ڪوشش ڪئي ويندي ته بل ۾ اهڙو اتفاق راءِ پيدا ڪيو وڃي ته ان کي اتفاق راءِ سان آئيني ترميم سمجهيو وڃي.بلاول ڀٽو زرداري چيو ته هو مولانا فضل الرحمان ۽ سندس ٽيم جو شڪرگذار آهي، جي يو آءِ سربراهه جي سڀاڻي نواز شريف سان ملاقات آهي، اسان کي ڊنر جي دعوت به ڏني وئي آهي.هن چيو ته پيپلزپارٽي ۽ جي يو آءِ جي وچ ۾ اڄ اتفاق راءِ ٿيو آهي، ان اتفاق راءِ ۾ ن ليگ کي به شامل ڪرڻ جي ڪوشش ڪندس.
