ميرپورخاص (ن س) آصفه ڊينٽل ڪاليج جي شاگردياڻي نمرتا جو ڪيس لوڙهڻ خلاف ايس ٽي پي طرفان بک هڙتال ڪيمپ قائم ڪئي وئي جنهن ۾ پارٽي چيئرمين ڊاڪٽر قادر مگسي پڻ شرڪت ڪئي. ان موقعي تي خطاب ڪندي ڊاڪٽر قادر مگسي چيو ته نمرتا جو معاملو هڪ سادو معاملو آهي کيس قتل ڪيو ويو آهي. اسان نه هتي سنڌ جي وڏي وزير مراد علي شاهه جي استعيفيٰ جو مطالبو ڪريون ٿا نه حڪومت ٽوڙڻ جي ڳالهه ڪريون ٿا اسان جو سادو مطالبو آهي ته نمرتا جا اصل قاتل گرفتار ڪيا وڃن. هن چيو ته يونيورسٽي انتظاميا لاڳيتو هن قتل ڪيس کي لوڙهڻ جي ڪوشش ڪري رهي آهي جيڪڏهن نمرتا ڇت ۾ ڦاهو کائي خودڪشي ڪئي آهي ته ان جو لاش هيٺ پٽ تي پاسيرو ڪيئن پيل هو ڇا خودڪشي ڪندڙ ماڻهو ڦاهو کائڻ کان پوءِ پاڻ ئي اچي هيٺ ليٽي سگهي ٿو؟ هن چيو ته تعليمي ادارن ۾ نياڻين جون عصمت دريون ڪري انهن جا خون لوڙهيا پيا وڃن جنهن سبب سنڌ جا ماڻهو وڏن ادارن ۾ پنهنجون نياڻيون داخل ڪرائڻ کان لنوائي رهيا آهن. ڊاڪٽر قادر مگسي چيو ته لاهور ليبارٽري جي رپورٽ ظاهر ڪري ٿي ته پوليس غلطي جو مظاهرو ڪيو فنگرپرنٽس واضح ۽ چٽا نه موڪليا ويا، نمرتا جو رئو دير سان موڪليوويو ته ڊي اين اي ۾ ثبوت ظاهر نه ٿين. پوليس يونيورسٽي انتظاميا سان ملي قاتلن کي بچائڻ لاءِ ثبوت ختم ڪيا آهن. ڊاڪٽر قادر مگسي چيو ته اسان هن ڪيس کي زنده رکڻ چاهيون ته جيئن نائلا رند جيان هي ڪيس به ماڻهن کان وسري نه وڃي. قادر مگسي الزام هڻندي چيو ته حڪومتي ڪارندا نمرتا جي قتل ۾ ملوث آهن، جيڪي قتل جا ثبوت ختم ڪرائڻ لاءِ لاڳيتو سرگرم آهن. ان موقعي تي گلزار سومرو، مير يونس ٽالپر،گلزار مگسي ۽ ٻين پڻ خطاب ڪيو.جنهن بعد ايس ٽي پي سربراه ڊاڪٽر قادر مگسي تيز گام سانحي ۾ شهيد ٿيل وقار مري ۽ حسن مري جي تڏي تي پهچي تعزيت ڪئي ۽ پوليس حراست ۾ فوت ٿيل ورجانگ ۽ لڇمڻ ڪولهي جي وارثن وٽ پهچي ڏک پڻ ونڊيو.
