اسلام آباد(بيورو رپورٽ) صدر آصف زرداري چيو آهي ته عالمي برادري فلسطيني عوام جي نسل ڪشي روڪڻ لاءِ فوري ۽ فيصلائتي قدم کڻي،صدر آصف زرداري فلسطينين سان يڪجهتي جي عالمي ڏينهن جي موقعي تي پنهنجي پيغام ۾ چيو ته فلسطينين جي حق خوداراديت لاءِ پاڪستان جي غير متزلزل عزم جو اظهار آهي، پاڪستان 1967ع کان اڳ واري سرحدن تي هڪ آزاد ۽ پائيدار فلسطيني رياست جي حمايت ڪري ٿو،هن چيو ته هو فلسطيني عوام جي آزادي، وقار ۽ انصاف جي جائز جدوجهد ۾ ساڻن گڏ آهي،عالمي برادري کي گهرجي ته فلسطيني عوام جي نسل ڪشي کي روڪڻ لاءِ فوري ۽ فيصلائتي قدم کڻي،صدر چيو ته عالمي ضمير فلسطين جي لکين ماڻهن جي حالت زار کي نظرانداز نٿو ڪري سگهي،اسرائيلي قبضو ۽ عالمي قانونن کي نظرانداز ڪرڻ خطي ۾ امن جي راهه ۾ سڀ کان وڏي رنڊڪ آهي، عالمي برادري ۽ سلامتي ڪائونسل کي غزه ۾ فوري ۽ غير مشروط جنگ بندي لاءِ قدم کڻڻ گهرجن.
