اسلام آباد (ويب ڊيسڪ) وفاقي گهرو وزير سينيٽر محسن نقوي چيو آهي ته 26 آگسٽ تي بلوچستان ۾ دهشتگردي جا واقعا نارمل ناهن، اهو سڀ رٿابندي تحت ڪيو ويو. سينيٽ ۾ خيالن جو اظهار ڪندي محسن نقوي چيو اسان کي خبر آهي ته بلوچستان ۾ دهشتگردي جي پويان ڪير آهي، واقعي ۾ ٻه ٽي گروپ ملوث آهن، اهي واقعا شنگهائي سهڪار تنظيم جي ڪانفرنس کي خراب ڪرڻ جي پلاننگ آهن، گهڻن ماڻهن کي تڪليف آهي ته ايس سي او نه ٿئي، اسان ان جي ميزباني ڪنداسين. هن چيو ته پارليامينٽ سپريم آهي، جيڪو رياست کي نٿو مڃي ۽ بندوق ٿو کڻي اهو دهشتگرد آهي، انهن جو بندوبست ڪنداسين، جيڪو رياست کي مڃي ٿو، انهن جا معاملا حل ڪرڻ جي ڪوشش ڪنداسين.
