اسلام آباد: (بيورو رپورٽ) تحريڪ انصاف جي اڳواڻ حامد خان اسلام آباد هاءِ ڪورٽ جي ججز جي خط جي معاملي تي رٽائرڊ ججز جي سربراهي ۾ ڪميشن ٺاهڻ جو حڪومتي فيصلو رد ڪري ڇڏيو.نجي چينل سان ڳالهيون ڪندي حامد خان چيو ته سپريم ڪورٽ جيڪڏهن رٽائرڊ ججز کي ڪميشن ٺاهڻ جو چيو آهي ته اها تاريخي غلطي ڪئي وئي آهي. سپريم ڪورٽ کي انهي خط تي پاڻمرادو نوٽيس وٺڻ گهرجي ها.ان سان گڏ ئي هن رٽائرڊ ججز جي سربراهي ۾ ڪميشن ٺاهڻ جو حڪومتي فيصلو رد ڪندي چيف جسٽس جي سربراهي ۾ پنج ججز تي ٻڌل ڪميشن ٺاهڻ جو به مطالبو ڪيو آهي.ٻئي طرف اطلاعات واري وزير عطا تارڙ چيو آهي ته فل ڪورٽ جو فيصلو آيو آهي ته ڪميشن ٺاهيو وڃي اسان ان تي عمل ڪري رهيا آهيون. هن چيو ته حڪومت سپريم ڪورٽ طرفان جاري ڪيل فل ڪورٽ جي پڌرائي موجب قدم کنيو آهي. هاڻ سمجهه ۾ نه پيو اچي ته ڪميشن تي تنقيد ڪير ۽ ڇو ڪري رهيو آهي. تنقيد ڪندڙن شايد پڌرائي ناهي پڙهي يا ان کي سمجهيو نه آهي. ياد رهي ته گذريل ڏينهن اسلام آباد هاءِ ڪورٽ جي 6 ججز سپريم جوڊيشل ڪونسل کي خط لکي مطالبو ڪيو هو ته اسان جسٽس(ر) شوڪت عزيز صديقي جي جاچ ڪرائڻ جي موقف جي مڪمل حمايت ڪريون ٿا جيڪڏهن عدليه جي آزادي ۾ مداخلت ٿي رهي هئي ته عدليه جي آزادي کي انڊر مائن ڪندڙ ڪير هئا؟ انهن جي مدد ڪنهن ڪئي؟ سڀني کي جوابده ڪيو وڃي. ته جيئن اهو عمل ٻيهر نه ورجائجي سگهجي. ججز جي ڪوڊ آف ڪنڊڪٽ ۾ ڪابه رهنمائي نه آهي ته اهڙي صورتحال کي ڪيئن رپورٽ ڪريون. اهڙي معاملي تي سپريم ڪورٽ جا 2 فل ڪورٽ اجلاس ٿيا هئا جڏهن ته چيف جسٽس ۽ وزيراعظم جي ملاقات به ٿي هئي جنهن کان پوءِ حڪومت عدالتي ڪميشن ٺاهڻ جو اعلان ڪيو.
