اسلام آباد (بيورو)پاڪستان تحريڪ انصاف جي اڳواڻ ۽ اڳوڻي وفاقي وزير فواد چوڌري وفاقي حڪومت کي خبردار ڪيو آهي ته جيڪڏهن بني گالا تي ڇاپو هنيو ويو ته جاتي وڏڙن ۽ ن ليگ قيادت جا گهر به پري نه آهن. لاهور ۾ ميڊيا جي نمائندن سان ڳالهائيندي فواد چوڌري چيو ته گهرو وزير راڻا ثناءُ الله ۽ ٻين خلاف جاچ شروع ڪئي وئي آهي، راڻا ثناءُ الله ۽ عطاءَ تارن کي ڪهڙي ڳالهه جو ڊپ آهي، اچو ته پاڻ کي قانون آڏو پيش ڪريون. هڪ سوال جي جواب ۾ فواد چوڌري چيو ته جيڪڏهن بني گالا تي ڇاپو هنيو ته پوءِ جاتي وڏڙن ۽ ن ليگ قيادت جا گهر به پري ناهن، جيڪڏهن روڊن رستن تي هلنداسين ته هي حڪومت 5 ڏينهن به نه هلي سگهندي. شهباز گل بابت سوال تي فواد چوڌري چيو ته شهباز گل تي تمام گهڻو دٻاءُ هو ته هن اهو بيان ڏنو ته هن عمران خان جي درخواست تي بيان ڏنو پر ڪالهه شهباز گل مئجسٽريٽ آڏو بيان ڏنو ته هن اهو ئي ڏنو هو. فواد چوڌري چيو ته نه ملاقات ٿي ۽ نه ئي ڪو بيان ڏنو ويو، راڻا ثناءُ الله کي من گھڙت ڪهاڻيون ٺاهڻ جو شوق آهي ملڪ ۾ جلد چونڊون ڪرائڻ بابت سوال تي تحريڪ انصاف جي اڳواڻ چيو ته جيڪڏهن شهباز شريف چونڊن جو اعلان ڪري ته پوءِ هو فريم ورڪ جي ڳالهه ڪري سگهي ٿو، حڪومت کان مطالبو ڪنداسين ته پنجاب ۽ خيبرپختونخواهه جي حڪومت ختم ڪئي وڃي. فواد چوڌري وڌيڪ چيو ته جيڪڏهن اسان کي ٻن صوبن جي حڪومتن کي ختم ڪرڻ جو چيو ويندو ته اسان سنڌ حڪومت کي ختم ڪرڻ جي ڳالهه ڪنداسين. هن چيو ته صوبائي حڪومتن کي ختم ڪرڻ جون ڳالهيون هڪ اليڪشن فريم ورڪ آهي، پهرين چونڊن جو اعلان ڪريو پوءِ ان معاملي تي به ڳالهائي سگهون ٿا.
