ڪراچي (اسٽاف رپورٽر)پاڪستان پيپلز پارٽي پارليامينٽرينز جي صدر ۽ اڳوڻي صدر آصف علي زرداري سان ملاقات کانپوءِ ايم ڪيو ايم جا سينيئر اڳواڻ انيس ايڊووڪيٽ ۽ رضا هارون پنهنجن ساٿين سميت پيپلز پارٽي ۾ شامل ٿي ويا.آصف علي زرداري انيس ايڊووڪيٽ ۽ رضا هارون کي پ پ ۾ شامل ٿيڻ تي ڀليڪار ڪيو.ان موقعي تي آصف علي زرداري ۽ ايم ڪيو ايم جي رابطا ڪميٽي جي اڳوڻي اڳواڻن انيس ايڊووڪيٽ ۽ رضا هارون به ڪراچي شهر جي ترقي، خوشحالي، امن جي قيام ۽ مفاهمتي ماحول جي حوالي سان چارٽر آف ڪراچي تي خيالن جي ڏي وٺ ڪئي.آصف علي زرداري چيو ته پاڪستان پيپلز پارٽي جي منشور جا ڪراچي شهر جي مستقبل تي ڏاڍا اثر پوندا.هن چيو ته پاڪستان پيپلز پارٽي ڪراچي وارن جي پارٽي آهي، اسان ڪراچي جي روشنين کي بحال ڪرڻ لاءِ ڪراچي واسين سان گڏجي جدوجهد ڪري رهيا آهيون، جيڪي امن جي دشمنن ۽ نفرتن جا سوداگر کسي ويا هئا.آصف زرداري چيو ته پاڪستان پيپلز پارٽي کي شهر قائد جي رهواسين جي ووٽن سان وفاق ۾ اقتدار ملڻ ان ڳالهه جي برابر هوندو ته ڪراچي جي عوام جي چونڊيل پارٽي پهريون ڀيرو وفاق ۾ حڪومت ڪندي.هن ڪراچي جي مستقبل کي دبئي سان تشبيهه ڏيندي وڌيڪ چيو ته اسان چاهيون ٿا ته سڄي دنيا مان ڪراچي ۾ سيڙپڪاري اچي ۽ ڪراچي دبئي جهڙو معاشي حب بڻجي وڃي جنهن سان نه رڳو پاڪستان پر دنيا جي سيڙپڪارن کي ان جي اهم جاگرافيائي حيثيت جي ڪري فائدو ٿيندو. سڀني کي به هن شهر مان فائدو وٺڻ گهرجي.ان موقعي تي آصف علي زرداري پ پ چيئرمين بلاول ڀٽو زرداري جي 10 نقاطي ايجنڊا جو ذڪر ڪيو ۽ اهو به چيو ته اسان اقتدار ۾ اچي ڪراچي سميت ملڪ جي هر شهر ۽ شهر لاءِ اهڙا فلاحي منصوبا آڻينداسين جنهن سان عام ماڻهو کي رليف ملندو.
