اسلام آباد(بيورو رپورٽ)اليڪشن ڪميشن ۾ پاڪستان تحريڪ انصاف جي انٽرا پارٽي اليڪشن ڪيس جي ٻڌڻي ٿي.ٻڌڻي دوران پي ٽي آءِ جي وڪيل عزير ڀنڊاري دليل ڏيندي چيو ته اسان 4 درخواستون داخل ڪيون، ايف آءِ اي ڇاپو هڻي اسان جو سمورو رڪارڊ ضبط ڪيو، اسان وٽ اصل دستاويز ۽ اليڪٽرانڪ رڪارڊ موجود ناهي.پي ٽي آءِ چيئرمين بئريسٽر گوهر چيو ته اوهان وڊيو ڏسو، اسان جو واٽر ڊسپينسر به کنيو ويو.وڪيل عزير ڀنڊاري چيو ته اليڪشن ڪميشن هدايت ڏئي ته ايف آءِ اي کان رڪارڊ حاصل ڪري سگهجي ٿو. اليڪشن ڪميشن سوالنامو موڪليو هو، پهريون سوال اهو هو ته تحريڪ انصاف جي موجوده حيثيت ڇا آهي؟ ان سوال جو جواب سپريم ڪورٽ جي مخصوص سيٽن بابت مختصر آرڊر ۾ آيو آهي. سپريم ڪورٽ قرار ڏنو ته تحريڪ انصاف سياسي پارٽي آهي ۽ آهي.ميمبر ڪميشن چيو ته اسان اهو ناهي چيو ته تحريڪ انصاف رجسٽرڊ سياسي پارٽي ناهي.پي ٽي آءِ جي وڪيل چيو ته سپريم ڪورٽ جي تفصيلي فيصلي جو انتظار ڪيو وڃي ته وضاحت ڪئي ويندي. اليڪشن ڪميشن مخصوص سيٽن بابت سپريم ڪورٽ کان وضاحت طلب ڪندي درخواست ۾ چيو آهي ته تحريڪ انصاف وٽ انتظامي ڍانچو ناهي. ميمبر اليڪشن ڪميشن چيو ته تحريڪ انصاف جي نئين انٽرا پارٽي چونڊن بابت اسان سپريم ڪورٽ ۾ ڪا به درخواست ناهي ڏني، اسان سپريم ڪورٽ کان پڇيو آهي ته انٽرا پارٽي اليڪشن تائين ڪنهن جي پارٽي سرٽيفڪيٽ کي تسليم ڪيو ويندو. بئريسٽر گوهر چيو ته مان 39 ميمبرن کي سرٽيفڪيٽ پڻ جاري ڪيا آهن جن کي توهان پي ٽي آءِ جي سڃاڻپ ڏني آهي.ميمبر اليڪشن ڪميشن چيو ته توهان جي دستخطن سبب 39 ميمبرن جا سرٽيفڪيٽ نه مليا، اسان اهو سپريم ڪورٽ جي حڪم تي ڪيو.
