اسلام آباد (ويب ڊيسڪ) ناڻي واري وفاقي وزير سينيٽر محمد اورنگزيب جو بيان عالمي مالياتي فنڊ (آءِ ايم ايف) سان اسٽاف ليول جي معاهدي کانپوءِ سامهون آيو آهي. پاڪستان ۽ آءِ ايم ايف وچ ۾ اسٽاف سطح تي قرض پروگرام لاءِ معاهدو ٿي ويو آهي، جنهن موجب آءِ ايم ايف پاڪستان کي 37 مهينن دوران 7 ارب ڊالر قرض ڏيندو. عملي جي سطح تي معاهدي جي حتمي منظوري آءِ ايم ايف جو ايگزيڪيوٽو بورڊ ڏيندو.آءِ ايم ايف جي بيان موجب قرض پروگرام ۾ مالياتي ۽ مانيٽري پاليسي کي مضبوط ڪرڻ ۽ ٽيڪس بيس کي وسيع ڪرڻ جا قدم شامل آهن. ان حوالي سان ناڻي واري وزير محمد اورنگزيب پنهنجي بيان ۾ چيو ته آءِ ايم ايف پروگرام پاڪستان ۾ ميڪرو اڪنامڪ استحڪام آڻڻ ۾ مددگار ثابت ٿيندو.ناڻي واري وزير جو چوڻ آهي ته آءِ ايم ايف پروگرام تحت ڍانچي سڌارن کي يقيني بڻائڻو آهي، اسان کي سرڪاري ناڻي، توانائي ۽ سرڪاري ادارن جي شعبن ۾ استحڪام آڻڻو آهي، ايندڙ سالن ۾ ڍانچي سڌارا آڻينداسين.
