اسلام آباد (بيورو رپورٽ) پاڪستان آمريڪي صدر ڊونلڊ ٽرمپ جي غزا بابت بيان کي غير منصفاڻو، تڪليف ڏيندڙ ۽ ڳڻتي جوڳو قرار ڏئي ڇڏيو. پرڏيهي آفيس ۾ هفتي واري بريفنگ دوران پرڏيهي کاتي جي ترجمان شفقت علي خان چيو ته پاڪستان فلسطين جي خواهش موجب ٻه رياستي حل جو حامي آهي ۽ جيڪو فلسطيني چاهين ٿا ان جي حمايت ڪري ٿو.ترجمان غزا ۾ عوام جي منتقلي واري بيان کي غير منصفاڻو، تڪليف ڏيندڙ ۽ ڳڻتي جوڳو قرار ڏنو ۽ مطالبو ڪيو ته عالمي برادري غزا ۾ اسرائيل جي جنگي ڏوهن جو محاسبو ڪري.ترجمان غزا ۾ اسرائيلي ظلمن جي ڀرپور مذمت ڪندي چيو ته پاڪستان جي فلسطين بابت پوزيشن انتهائي واضح آهي پاڪستان فلسطيني عوام سان گڏ آهي ۽ فلسطينين جي حقِ خود اراديت جي جدوجهد جي حمايت جاري رکندو.پرڏيهي کاتي جي ترجمان جو چوڻ هو ته صدر زرداري بيجنگ ۾ چيني صدر شي جن پنگ ۽ چيني وزيراعظم لي جيانگ سان ملاقات ڪئي.ترجمان موجب، ملاقات ۾ پاڪستان چين جي اصول تي پنهنجي حمايت جو عزم ورجايو ويو ۽ پاڪستان طرفان چين جي بليٽ اينڊ روڊ قدمن کي اڳتي وڌائڻ تي اتفاق ڪيو ويو آهي.
