اسلام آباد(بيورو رپورٽ) بچاءَ واري وزير خواجا آصف چيو آهي ته آذربائيجان ڪشمير ڪاز تي پاڪستان جي حمايت ڪري رهيو آهي، پاڪستان ۽ آذربائيجان وچ ۾ ويجها دوستاڻه لاڳاپا آهن، ٻنهي ملڪن ۾ مختلف شعبن ۾ سهڪار جا وسيع موقعا موجود آهن. پاڪستان ۽ آذربائيجان وچ ۾ اٺين گڏيل اجلاس کي خطاب ڪندي خواجا آصف چيو ته هو توانائي جي شعبي ۾ آذربائيجان جي صلاحيتن مان فائدو حاصل ڪندا، توانائي جي شعبي ۾ ٻنهي ملڪن جي ڀائيواري فائديمند ٿيندي. سندس چوڻ هو ته دفاعي شعبي ۾ ٻنهي ملڪن ۾ معاهدن سان لاڳاپا وڌيڪ مضبوط ٿيندا. بچاءَ واري وزير خواجا آصف چيو ته سياحت جي شعبي ۾ سيڙپڪاري جا ڪيترائي موقعا موجود آهن، پاڪستان ۽ آذربائيجان ۾ اسٽريٽجڪ پارٽنرشپ آهي. هن چيو ته بزنس ٽو بزنس لاڳاپن سان ٻنهي ملڪن ۾ سيڙپڪاري وڌندي، آذربائيجان خطي ۾ اهم ڪردار ادا ڪندو. بچاءَ واري وزير خواجا آصف چيو ته ثقافتي ورثي جي تحفظ ۽ واڌاري لاءِ گڏيل سهڪار ضروري آهي، ٻئي ملڪ اي ويزا ۽ سڌي ريت اڏامن لاءِ ڪم ڪري رهيا آهن.
