پشاور (ويب ڊيسڪ) خيبرپختونخواهه جي سڌ سماءَ واري صلاحڪار بئريسٽر سيف الله چيو آهي ته وڏي وزير علي امين گنڊاپور کي اهڙي تقرير نه ڪرڻ گهرجي ها، ان تي حڪومت جو رد عمل به درست ناهي. ڳالهائيندي بئريسٽر سيف چيو ته علي امين کي تقرير نه ڪرڻ گهرجي، ماڻهو تجربي مان سکن ٿا، پي ٽي آءِ چيئرمين بئريسٽر گوهر ان تي معافي وٺي ڇڏي آهي.سڌ سماءَ واري صلاحڪار چيو ته علي امين سان رات دير سان رابطو ڪيو ويو پر تفصيل سان ڳالهه ٻولهه نه ٿي سگهي، هن ٻڌايو ته ساڻس گڏ ٻه ماڻهو به هئا ۽ سندن فون بند آهن.بئريسٽر سيف چيو ته جيڪڏهن جمهوري حق نه ڏنا وڃن ته پوءِ جلسن ۾ تقريرون جذباتي انداز ۾ ڪيون وڃن ٿيون. ڪارڪنن جي جذبن تي ضابطو آڻڻ لاءِ ليڊر جي تقرير سياسي گروپ ڊينامڪس آهي، تقرير ۾ ڪجهه لفظ استعمال ڪيا ويا جيڪي اشتعال انگيز هئا.هن وڌيڪ چيو ته جيڪڏهن قابل اعتراض لفظ به ڳالهايون ٿا ته ان لاءِ به قانون آهن، بدنامي جا قانون ۽ ٻيا قانون آهن، ان تحت ڪارروائي ڪئي وڃي، پارليامينٽ جو اجلاس ختم ٿيڻ سان ئي ايم اين ايز کي گرفتار ڪرڻ شروع نه ڪيو وڃي ماحول ڄڻ ته ڪا غير ملڪي فوج حملو ڪري ڇڏيو هجي.
