قومي حڪومت مطلب جاگيردارن، سرمائيدارن کي قوم مٿان مسلط ڪرڻ آهي

ڪراچي/ سکر (اسٽاف رپورٽرامير جماعت اسلامي پاڪستان سراج الحق چيو آهي ته پ پ ڪو چيئرمين آصف علي زرداري جي تجويز ڪيل قومي حڪومت جو مطلب جاگيردارن، سرمائيدارن ۽ ٻاهران آيل ٽيڪنوڪريٽس کي قوم مٿان مسلط ڪرڻ آهي، ساڳيو گروه ڪيترن ئي ڏهاڪن کان عوام جو رت چوسي رهيو آهي، قومي حڪومت جو آئين ۾ ڪٿي به ذڪر ڪونهي، قوم 16 مهينا 13 جماعتن جي گڏيل حڪومت ڏسي ڇڏي جيڪي چئي رهيا آهن ته “ ملڪ ابو بچائيندو” عوام کي ٻڌائن ته پهريان ڪير اقتدار ۾ هو؟ ڪراچي کي تباه ڪيو ويو، پ پ، ن ليگ غزه جي مظلوم عوام لاءِ هڪ ريلي يا جلسو به ڪونه ڪيو، آمريڪي سامراج کان خوفزده حڪمران طبقو چوي ٿو ته فلسطين انهن جو اشو آهي ئي ڪونه، ڪورونا، سيلاب ۾ غريب پاڪستانين جي خبر لهڻ به هنن جو مسئلو ڪونه هو، هنن جو مقصد فقط خود ۽ پنهنجي ٻارن کي اقتدار ۾ رکڻ ۽ ٻاهرين ملڪن ۾ وڏيون ملڪيتون ٺاهڻ آهي، عوام ٻن ويلن جي ماني ڳڀي لاءِ پريشان جڏهن ته حڪمران طبقي جي بينڪ بيلنس ۽ شگر ملز ۾ ڏينهون ڏينهن اضافو ٿيندو پيو وڃي. اهڙن خيالن جو اظهار هن مهراڻ ڪلچرل سينٽر سکر ۾ جماعت اسلامي سنڌ پاران رٿيل انتخابي ڪنوينشن کي خطاب ڪندي ڪيو. سراج الحق وڌيڪ چيو ته نام نهاد وڏيون پارٽيون، بيوروڪريسي ۽ دولت جي بنياد تي سياست ڪن ٿيون انهن جي ليڊرشپ ۾ ڪابه اهليت ڪونهي هن ڀيري عام چونڊن ۾ آزمايل پارٽين جي ڪاميابي جو مطلب پاڪستان جي شڪست هوندي، قوم 08 فيبروري تي مافيا جي سياست کي دفن ڪري ڇڏي. سنڌ ۾ جماعت اسلامي جا اُميدوار اهو نه ڏسن ته سندن مقابلي ۾ ڪيڏو وڏو جاگيردار بيٺل آهي، اوهان اسلام، پاڪستان جا سفير ۽ عوامي خدمت جا مثال آهيو، جيڪڏهن افغانين آمريڪا ۽ فلسطين ۾ حماس اسرائيل جهڙي طاقتن کي شڪست ڏني آهي ته اسان به پاڪستان ۾ سامراج جي ايجنٽن کي شڪست ڏينداسين. اسان جي تحريڪ ۾ مايوسي جي ڪابه جڳهه ڪونهي، نااُميدي ڪينسر کان بدتر، ڪاميابي ان ۾ آهي ته الله ۽ سندس مخلوق سان کان راضي ٿي وڃي. سراج الحق وڌيڪ چيو ته جماعت اسلامي اقتدار ۾ اچي سڀ کان پهريون ڪم وياج واري نظام کي ختم ڪرڻ جو ڪندي، پي ڊي ايم اقتدار ۾ رهي جنهن جي سربراهي هڪ مذهبي جماعت جي قائد ڪئي اُميد هئي ته هو وياج کي ختم ڪرائيندو، پر ائين نه ٿي سگهيو، جماعت اسلامي اهو ڪم ڪندي، اسان معيشت کي زڪواة ۽ عشر جي اصولن تي جوڙينداسين. پي ٽي آءِ مديني جي رياست جو واعدو ڪري قوم جا پوڻا چار سال ضايع ڪيا، جماعت اسلامي نوجوانن ۾ مقبول ٿي رهي آهي اسان پڙهيل لکيل نوجوانن ۾ سرڪاري زمينون مُفت تقسيم انهن کي روزگار ڏينداسين. جماعت اسلامي غزه جي مظلوم مسلمانن لاءِ ڪراچي، لاهور ۽ اسلام آباد سميت وڏن شهرن ۾ ملين مارچ ڪيا، قومي فلسطين ڪانفرنسون منعقد ڪيون، سفيرن سان ملاقاتون، اهل غزه جي عملي مدد لاءِ اسلامي ملڪن جا دورا ڪيا، پر افسوس حڪمران طبقو مڪمل خاموش تماشائي بڻيل رهيو. هن وڌيڪ چيو ته دنيا ۾ حق ۽ باطل جي ويڙهه جاري آهي باطل خلاف خاموشي به ان جي مدد ڪرڻ برابر آهي، قوم فلسطين ۽ ڪشمير کي آزاد ڏسڻ چاهي ٿي ته جماعت اسلامي جو ساٿ ڏي. پاڪستان ظالم جاگيردارن، لينڊ ۽ ڊرگ مافيا لاءِ ڪونه ٺهيو هو، ملڪ ان لاءِ آزاد ٿيو هو ته هتي اسلامي نظام قائم ٿئي، بي لاگ احتساب ۽ عدل توڙي انصاف جو مان مٿاهون ٿئي جتي هرشخص جي جان، مال ۽ عزت محفوظ هجي. صرف جماعت اسلامي ئي اسٽيٽس ڪو کي ختم ڪري سگهي ٿي. سراج الحق جماعت اسلامي جي نامزد اُميدوارن کي هدايت ڪئي ته هو ايندڙ 60 ڏينهن جو لائحه عمل جوڙي عوام وٽ وڃن ۽ جماعت اسلامي جي فلاحي پاڪستان جو پيغام عام ڪن. مرڪزي امير پراڻي سکر ۾ مدرسه تفهيم القرآن جي نئين عمارت جو سنگ بنياد پڻ رکيو. انتخابي ڪنوينشن کي مرڪزي نائب امير لياقت بلوچ، مولانا اسدالله ڀٽو، ڊاڪٽر معراج الهدى صديقي، صوبائي امير محمد حسين محنتي، نائب امير ممتاز حسين سهتو، جنرل سيڪريٽري ڪاشف سعيد شيخ خطاب ڪيو جڏهن ته عورت ونگ جي عطيه نثار، رخشنده منيب سميت اپر سنڌ جي 11 ضلعن مان قومي ۽ صوبائي اسيمبلين جي نامزد اُميدوارن، ضلعي اميرن به شرڪت ڪئي.

کیٹاگری میں : سنڌ

پهنجو تبصرو موڪليو