ڪراچي (اسٽاف رپورٽر): سنڌ ۽ پنجاب جي نگران وڏن وزيرن پنهنجي لاڳاپيل چيف سيڪريٽريز ۽ انسپيڪٽر جنرلز آف پوليس سان گڏ ٻنهي صوبن جي دريائي علائقن ۾ ڌاڙيلن خلاف گڏيل آپريشن شروع ڪرڻ جي حڪمت عملي کي حتمي شڪل ڏيڻ لاءِ وزيراعليٰ هائوس ۾ اعليٰ سطح اجلاس ٿيو. اجلاس ۾ پنجاب جي وڏي وزير محسن نقوي سان سندس سڌ سماءَ واري وزير عامر مير، چيف سيڪريٽري زاهد اختر زمان ۽ آءِ جي پوليس عثمان انور گڏ هئا جڏهن ته سنڌ جي وڏي وزير جسٽس مقبول باقر سان سندس گهرو وزير برگيڊيئر (ر) حارث نواز، چيف سيڪريٽري ڊاڪٽر فخر عالم ۽ آءِ جي پوليس رفعت مختار ميمڻ هئا جنهن ڌاڙيلن خلاف گڏيل ڪلين اپ آپريشن بابت خيالن جي ڏي وٺ ڪئي. ٻنهي وڏن وزيرن ڀنگ عيوض اغوا جي وارداتن ۾ ملوث گروهن، سندن مجموعي طاقت، پوزيشن ۽ سنڌو درياهه جي گهاٽي ٻيلن ۾ ڳجهن هنڌن تي خيالن جي ڏي وٺ ڪئي. ۽ پنهنجي ويچار ونڊيندي اتفاق ڪيو ته سنڌ ۽ پنجاب ۾ درياهه جي ٻنهي پاسن کان حملا ڪيا وڃن ته جيئن هڪ ئي ڀيري هن داغ کي هميشه لاءِ ختم ڪري سگهجي. وڏي وزير جسٽس مقبول باقر چيو آهي ته مان سکر ۽ گهوٽڪي جو دورو ڪندي اتي 2 ڏينهن ترسيو آهيان ته جيئن ڌاڙيلن خلاف آپريشن کي حتمي شڪل ڏني وڃي ۽ مون پوليس کي ضروري خريداري سميت آپريشن شروع ڪرڻ لاءِ پنجاب پوليس سان گڏيل لاڳاپا قائم ڪرڻ جي مڪمل منظوري ڏني آهي. پنجاب جي وڏي وزير محسن نقوي چيو آهي ته اجلاس جو مقصد آپريشن جي حڪمت عملي کي حتمي شڪل ڏيڻ هو ڇوته ٻنهي صوبن جي پوليس گڏجي ان لعنت کي ختم ڪري سگهي ٿي. پنجاب: انسپيڪٽر جنرل آف پوليس پنجاب اجلاس کي بريفنگ ڏيندي ٻڌايو ته مکيه ڪچو علائقو راجن پور ضلعي ۾ اچي ٿو پر گهوٽڪي ۽ ڪشمور جا ڪچا علائقا (ماچڪو ۽ ڪوٽ سبزل وارا علائقا) رحيم يار خان جي ڀرسان آهن جيڪو 176 ڪلوميٽر ۽ ويڪر 25 ڪلوميٽر آهي. سنڌو درياءَ جي ڪناري جون زمينون تمام زرخيز آهن جتي ڪمند پوکيو وڃي ٿو. سنڌ جي وڏي وزير کي ٻڌايو ويو ته راجن پور ۾ ست ٻيٽ آهن جيڪي رحيم يار خان کي به متاثر ڪن ٿا جن ۾ ڪچو ڪراچي، ڪچو عمراڻي، ڪچو حيدرآباد، ڪچو بنون، ڪچو مورو، ڪچو جمال، ڪچو کوپڙو شامل آهن. پنجاب جي وڏي وزير محسن نقوي چيو آهي ته گهوٽڪي جو ڪچو رونتي ۽ ڪشمور جو ڪچو گيهلپور رحيم يار خان کي لڳي ٿو. آءِ جي پنجاب جو چوڻ هو ته گروپن ۾ علامتي لاڳاپا آهن. هن وڌيڪ چيو ته راجن پور ۾ 5 ۽ ڪشمور ۽ گهوٽڪي ضلعن ۾ 11 گينگز جي سڃاڻپ ٻنهي صوبن وچ ۾ قائم ڪيل انفارميشن شيئرنگ ذريعي ڪئي وئي. پنجاب جي وڏي وزير چيو ته 11 ڌاڙيلن جي گينگ ۾ 600 جي لڳ ڀڳ ميمبر آهن کين حڪومتي رٽ چيلنج ڪرڻ جي اجازت نه ٿي ڏئي سگهجي تنهنڪري گڏيل آپريشن ناگزير آهي. هن وڌيڪ چيو ته پنجاب پوليس 9 پوليس ڪيمپون ۽ 53 پوليس پوسٽون قائم ڪيون آهن جيڪي ڌاڙيلن تي حملي ۾ مدد ڪنديون. آءِ جي سنڌ پوليس رفعت مختار ٻنهي وڏن وزيرن کي بريفنگ ڏيندي چيو ته سندن پوليس ڏوهارين خلاف مسلسل ڇاپا هنيا آهن. هن چيو ته اسان ڪچي واري علائقي ۾ حفاظتي بند سان گڏ 210 پوليس پوسٽون قائم ڪيون آهن ۽ آپريشن شروع ڪرڻ لاءِ پنجاب جي وڏي وزير سان تفصيلي سامان جي لسٽ شيئر ڪئي آهي. وڏي وزير چيو ته مون ڪشمور ۽ شڪارپور ۾ ڪنٽرول روم قائم ڪيا آهن. ٻنهي وڏن وزيرن پنهنجي پنهنجي ٽيمن جي مشاورت سان سامان، گيجٽس، موبائيل جيمرز، ڪال انٽرسيپٽرز جي چيڪ لسٽ تيار ڪئي ۽ ٻنهي صوبن مان هڪ ئي وقت آپريشن شروع ڪرڻ لاءِ پوليس ۽ رينجرز کي مقرر ڪرڻ ۽ جديد ٽيڪنالاجي استعمال ڪندي حملي جو فيصلو پڻ ڪيو. سنڌ جي وڏي وزير چيو ته ڌاڙيلن جي سهولتڪارن ۽ اطلاع ڏيندڙن کي اڳ ئي گرفتار ڪيو ويو آهي ته جيئن ڪنهن به قسم جي معلومات ٻاهر نڪرڻ کانسواءِ آپريشن شروع ڪري سگهجي.
