ڪراچي(ويب ڊيسڪ)هيرا ڇوڪرين جا بهترين دوست هوندا آهن، ۽ اها ڇوڪري دانشير مبين آهي، جيڪا خميس ڏينهن ماسڪو ۾ منعقد ٿيل ٻئي اوپن يوريشين فلم ايوارڊز ۾ بهترين اداڪارا جو ڊائمنڊ بٽر فلائي ايوارڊ وصول ڪرڻ لاءِ موجود هئي.
اداڪارا کي فلم ميرا لياري ۾ پنهنجي اداڪاريءَ تي ايوارڊ ڏنو ويو. هن فلم ۾ هن هڪ اهڙي ڇوڪريءَ جو ڪردار ادا ڪيو، جيڪا ڪراچيءَ جي بدنام علائقي لياري ۾ سماجي دٻاءَ باوجود فٽبال کيڏڻ لاءِ جدوجهد ڪري ٿي.
ميرا لياري جي ڪهاڻي هڪ معذور فٽبال ڪوچ (عائشه عمر) جي چوڌاري گهمي ٿي، جيڪا تشدد ڀري شاديءَ مان ڇوٽڪارو حاصل ڪرڻ کان پوءِ لياري واپس اچي ٿي، جتي هوءَ علائقي جي ڇوڪرين لاءِ فٽبال ٽرائلز ڪرائي ٿي. اتي افسانه (مبين)، جيڪا پنهنجي سخت مزاج پيءُ جي مخالفت ڪري ٿي، ۽ ڪشمالا (ٽرينيٽ لوڪاس)، جيڪا زبردستي شاديءَ کان بچڻ لاءِ گهران نڪري ٿي، فٽبال جي خوبصورت راند ۾ پنهنجي لاءِ نئون رستو ڳولين ٿيون. اهي ڪوچ سان گڏ لڪ ڇپ ۾ ٽريننگ ڪن ٿيون ته جيئن قومي سطح تي مقابلي ۾ حصو وٺي سگهن.
جمعي ڏينهن انسٽاگرام تي هڪ پوسٽ ۾ مبين چيو ته اهڙي ڪردار تي مڃتا ملڻ، جيڪو ”عورتن، سندن طاقت، ثابت قدمي ۽ پنهنجا خواب پورا ڪرڻ جي حق کي اجاگر ڪري ٿو، هڪ اهڙو اعزاز آهي، جنهن کي لفظن ۾ بيان ڪرڻ مون لاءِ ڏکيو آهي.“
هن چيو ته عورتن جون ڪهاڻيون ٻڌائڻ ضروري آهي، خاص طور تي ”انهن عورتن جون ڪهاڻيون، جيڪي مقرر ڪيل اميدن کي چئلينج ڪن ٿيون، رڪاوٽون ٽوڙين ٿيون، پنهنجو آواز بلند ڪن ٿيون ۽ انهن هنڌن تي پنهنجو مقام ٺاهڻ جي همت ڪن ٿيون، جتي وڃڻ لاءِ کين ڪڏهن به همٿايو نه ويو.“
اداڪارا چيو ته هوءَ پاڻ کي ”بيحد خوش قسمت“ سمجهي ٿي، جو اهڙي ڪهاڻيءَ جو حصو بڻي، جيڪا رڳو وندر کان اڳتي وڌي هڪ مقصد جي نمائندگي ڪري ٿي. هن چيو ته ”جيڪڏهن هن فلم هڪڙي به ڇوڪريءَ کي اهو يقين ڏياريو آهي ته هوءَ اتي به پهچي سگهي ٿي، جتي سندس دل کيس وٺي وڃي ٿي، ته پوءِ هن فلم واقعي هڪ بامقصد ڪم ڪيو آهي.“
هن انهن سڀني ماڻهن جا ٿورا مڃيا، جن فلم تي اعتماد ڪيو، ان کي حقيقت جو روپ ڏيڻ ۾ مدد ڪئي ۽ انهن ڏسندڙن جا به ٿورا مڃيا، جن فلم کي کليل دل سان قبول ڪيو.
ايوارڊ بابت پنهنجي پوسٽ ۾ فلم جي هدايتڪار علي سجاد شاهه چيو ته مبين جي ڪاميابي پوري ٽيم جي گڏيل محنت جو نتيجو آهي، خاص طور تي پروڊيوسر وقاص رضوي ۽ عائشه عمر جي ڪوششن جو.
ڊائمنڊ بٽر فلائي ايوارڊز جو پهريون ڀيرو 2025ع ۾ اهتمام ڪيو ويو هو. اهي ايوارڊز يوريشين اڪيڊمي فار سئنيماٽوگرافڪ آرٽس، روس جي ثقافت واري وزارت جي سهڪار سان پيش ڪندي آهي.
مبين جي ڪاميابي انهن ايوارڊز جي ٻنهي تقريبن ۾ پاڪستان جي ٻي ڪاميابي آهي. گذريل سال سونيا حسين فلم ديمڪ ۾ پنهنجي ڪردار تي بهترين معاون اداڪارا جو ايوارڊ حاصل ڪيو هو.
جيتوڻيڪ اهڙي مڃتا پاڻ ۾ هڪ وڏو انعام آهي، پر ڊائمنڊ بٽر فلائي ايوارڊ کٽيندڙن کي 5 هزار ليبارٽريءَ ۾ تيار ڪيل هيرن سان جڙيل هڪ مجسمو پڻ ڏنو ويندو آهي. ان کان سواءِ کين روس جي اوڀر واري علائقي سخا ريپبلڪ جي کاڻين مان ڪڍيل هڪ هيرو به ڏنو ويندو آهي. بهترين فلم جي ايوارڊ لاءِ 10 ڪيريٽ جو هيرو، جڏهن ته ٻين سڀني ايوارڊ ماڻيندڙن کي پنج ڪيريٽ جا هيرا ڏنا ويندا آهن.
گذريل سال منتظمين ۽ اسلام آباد ۾ روسي سفارتخاني جي بيانن موجب، رڳو ننڍن هيرن جي ماليت ئي 250 هزار ڊالرن کان وڌيڪ هئي.
هن سال 19 ملڪن جي ڪل 41 فلمن کي نامزد ڪيو ويو، جڏهن ته سڀ کان وڏو ايوارڊ روسي جنگي فلم آگسٽ کٽيو، جنهن جي هدايتڪاري نڪيتا ويسوٽسڪي ۽ ايليا ليبيڊيوف ڪئي آهي.
ٻين ايوارڊ کٽيندڙن ۾ ڪرغزستان جي هدايتڪار ڪني بيڪ ڪالماتوف کي فلم آيتماٽوف، ايراني اسڪرين رائيٽر عليرضا معتمدي کي فلم ڊاٽر آف دي فيئري ليڊي ۽ قازقستان جي اداڪار زاسولان ڪوپبرگينوف کي فلم ري اسٽارٽ تي ايوارڊ ڏنو ويو.
