اسلام آباد (بيورو رپورٽ)وفاقي ڪابينا ٻن مهينن ۾ حلف نه کڻندڙ پارليامينٽ ۽ صوبائي اسمبلي جي ميمبرن کي خود بخود ڊي سيٽ ڪرڻ ۽ خالي ٿيل جاءِ تي نئين سر چونڊ ڪرائڻ بابت آرڊيننس جاري ڪرڻ جي منظوري ڏئي ڇڏي آهي. اها ڳالهه اطلاعات واري وفاقي وزير فواد چوڌري وزيراعظم عمران خان جي صدارت ۾ ٿيل ڪابينا جي اجلاس ۾ ڪيل فيصلن بابت بريفنگ ڏيندي ٻڌائي.
هن چيو ته وزيراعظم مينار پاڪستان تي ٽڪ ٽاڪر عورت سان پيش آيل واقعي جهڙن ٻين واقعن تي ڳڻٽي ظاهر ڪندي انهن کي روڪڻ لاءِ حڪمت عملي جوڙن جي هدايت ڪئي آهي. هن چيو ته 90 لک سمنڊ پار پاڪستانين کي ووٽ جي اجازت ن ڏيڻ زيادتي آهي، پي پي ۽ نواز ليف نٿا چاهين ته کين ووٽ جو حق ملي. اسين نادرا کي چيو آهي ته هو پرڏيهه ۾ رهندڙ پاڪستانين جي ووٽ لاءِ مڪينزم تيار ڪري. هن ٻڌايو ته ڪابينا محمد اشفاق کي ايف بي آر جو نئون چيئرمين مقرر ڪرڻ جي منظوري ڏني آهي.
ياد رهي ته ٽن سالن موجوده حڪومت 5 ايف بي آر جا چيئرمين تبديل ڪري چڪي آهي. هن ٻڌايو ته ڪابينا 37 نيون تيار ٿيندڙ دوائن جي قيمت مقرر ڪئي ۽ 12 دوائن جي قيمت ۾ واڌ ڪرڻ جي منظوري ڏني. ڪابينا ڊاڪٽر نديم ظفر کي شماريات جي اداري جو سربراهه مقرر ڪرڻ ۽ ڊاڪٽر احمد مجتبيٰ کي انٽليڪچوئل پراپرٽي آرگنائيزيشن جي چارج ڏيڻ جي منظوري به ڏني.
