ڪراچي (پ ر )ميئر ڪراچي بيرسٽر مرتضيٰ وهّاب شهرين خاص طور تي اقليتي برادري جي بنيادي حقن جي تحفظ ۽ سهولتن جي فراهمي ڏانهن هڪ اهم قدم کڻندي ضلع ملير جي يونين ڪائونسل چوڪنڊي ۾ هندو برادري جي مستحق خاندانن لاءِ 100 سولر پاور گهر تعمير ڪرڻ جو اعلان ڪيو آهي. هن منصوبي جو اعلان ميئر ڪراچي جي دوريِ ملير دوران ڪيو ويو، جتي هن جاري ترقياتي منصوبن ۽ شهري سطح تي عوامي فلاح جي قدمن جو جائزو ورتو ميئر ڪراچي ان موقعي تي پارٽي جي سينيئر اڳواڻن ۽ مقامي نمائندن سان گڏ هو. هن علائقي جي رهواسين سان سڌي ريت ملاقات ڪئي ۽ تجويز ڪيل هائوسنگ منصوبي سميت ٻين ترقياتي اسڪيمَن بابت آگاهي ڏني. هي منصوبو جديد، پائيدار ۽ توانائي جي اثرائتي استعمال تي ٻڌل رهائشي يونٽن تي مشتمل هوندو، جن ۾ سولر پاور سسٽم لڳايا ويندا ته جيئن فائدو حاصل ڪندڙ خاندانن جي رهائش ۽ توانائي جون ضرورتون پوريون ٿي سگهن.علائقي جي رهواسين سان ڳالهائيندي ميئر ڪراچي شهر جي مستقبل بابت حوصلا افزا معلومات پڻ ڏني. هن چيو ته ايندڙ سال ڪراچي لاءِ فنڊن ۾ واڌ ڪئي ويندي ۽ شهر جي انفراسٽرڪچر کي بين الاقوامي معيار مطابق بڻائڻ لاءِ ڪيترائي ميگا منصوبا شروع ڪيا ويندا، جن ۾ روڊ، عوامي سهولتون، يوٽيلٽيز ۽ شهري انفراسٽرڪچر شامل آهن.ميئر ڪراچي بيرسٽر مرتضيٰ وهّاب پاڪستان پيپلز پارٽي جي قيادت، صدرِ مملڪت آصف علي زرداري، چيئرمين بلاول ڀٽو زرداري ۽ فريال تالپور جي عوامي خدمت ۽ ڪراچي ۾ فلاحي منصوبن جي دائري کي وڌائڻ واري عزم کي اجاگر ڪيو. هن چيو ته پيپلز پارٽي جي لڳاتار عوامي خدمت سياسي پروپيگنڊا ۽ بي بنياد تنقيد جي مقابلي ۾ پارٽي جي ثابت قدمي ۽ سنجيدگي کي ظاهر ڪيو آهي.ميئر ڪراچي چيو ته “هي شهر هميشه ڀٽو جو رهيو آهي ۽ اڳتي به رهندو.” هن زور ڏنو ته اقليتي برادري لاءِ سولر پاور گهرن جي تعمير چيئرمين بلاول ڀٽو زرداري جي جامع ۽ برابري تي ٻڌل ويزن جي عڪاسي ڪري ٿي، جنهن تحت هر شهري کي بغير ڪنهن مذهبي فرق جي بنيادي سهولتون، عزت ۽ تحفظ فراهم ڪرڻ يقيني بڻايو پيو وڃي.هي منصوبو ڪي ايم سي ۽ پاڪستان پيپلز پارٽي جي وسيع تر حڪمتِ عملي جو حصو آهي، جنهن جو مقصد ڪراچي کي هڪ جديد، پائيدار ۽ همگير ميٽروپوليٽن شهر ۾ تبديل ڪرڻ آهي، جتي خاص توجهه رهائش، اقليتي ڀلائي ۽ ماحول دوست قدمن تي ڏني پئي وڃي. ميئر ڪراچي بيرسٽر مرتضيٰ وهّاب عوامي خدمتن جي فراهمي ۾ تيزي آڻڻ، شهري سهولتن کي بهتر بڻائڻ ۽ اهڙن منصوبن تي عملدرآمد جي عزم جو ورجاءُ ڪيو، جيڪي ڪراچي جي سڀني شهرين جي زندگيءَ جي معيار کي بلند ڪندا.
