ڪراچي (اسٽاف رپورٽر) پاڪستان پيپلز پارٽي جي چيئرمين بلاول ڀٽو زرداري چيو آهي ته ملڪ کي درپيش چئلينج صرف نعرن سان نه پر خدمت جي جذبي سان حل ٿيندا.ڪراچي ۾ جناح سنڌ ميڊيڪل يونيورسٽي جي ڪانووڪيشن کي خطاب ڪندي بلاول ڀٽو چيو ته سنڌ هميشه علم، رواداري ۽ ثابت قدمي جي سرزمين رهي آهي. سنڌو ماٿري جي تهذيب کان وٺي جديد ڪراچي تائين، هن مٽي مفڪر، طبيب ۽ اصلاح پسند پيدا ڪيا آهن.هن چيو ته پاڪستان اڃا تائين صحت جي شعبي ۾ سنگين چئلينجن کي منهن ڏئي رهيو آهي، جهڙوڪ ماءُ ۽ ٻار جي موت، غذائي کوٽ ۽ موسمياتي تبديلي جي ڪري ٿيندڙ بيماريون.پاڪستان پيپلز پارٽي جي چيئرمين وڌيڪ چيو ته درپيش چئلينج صرف نعرن سان حل نه ٿيندا، پر توهان جي صلاحيتن، اخلاقيات ۽ ضرورت جي وقت ۾ خدمت جي جذبي سان حل ٿيندا.
