ڪراچي (اسٽاف رپورٽر) وزير تعليم سنڌ سيد سردار علي شاهه جي هدايتن تي اسڪول ايجوڪيشن اينڊ لٽريسي کاتي سنڌ استادن جي رهنمائي ۽ مسئلن جي حل لاءِ اهم اڳڀرائي ڪندي “سنڌ ٽيچرز هيلپ لائين” قائم ڪري ڇڏي آهي. هي هيلپ لائين سڄي سنڌ جي سرڪاري ۽ خانگي اسڪولن جي استادن لاءِ مخصوص ھوندي، تعليم واري وزير سيد سردار علي شاهه چيو آهي ته سرڪاري ۽ خانگي اسڪولن جي استادن جي شڪايتن، تجويزن ۽ پيشيوراڻي رهنمائي لاءِ هڪ باقاعده ۽ مؤثر پليٽ فارم فراهم ڪيو ويو آهي، جيڪو استادن جي مسئلن جي وقت سر حل ۾ مددگار ثابت ٿيندو. هي ٽيچرز هيلپ لائين سنڌ ٽيچر ايجوڪيشن ڊولپمينٽ اٿارٽي (STEDA) جي 18هين بورڊ آف گورنرز اجلاس جي فيصلي تحت قائم ڪئي وئي آهي. شروعاتي مرحلي ۾ هيلپ لائين هر اربع ڏينهن منجهند 12 وڳي کان 2 وڳي تائين فعال رهندي. استادن جون شڪايتون ۽ مسئلا صوبائي اسيمبلي رڪن تنزيلا ام حبيبه ۽ ڊائريڪٽوريٽ آف انسپيڪشن اينڊ رجسٽريشن آف پرائيويٽ انسٽيٽيوشنز (DGIRPI) جي ايڊيشنل ڊائريڪٽر رافيه جاويد ملاح تي ٻڌل ريڊريسل ڪميٽي سڌو سنئون وصول ڪندي. استاد هيلپ لائين نمبر 1464945-0315 تي رابطو ڪري سگهن ٿا. وزير تعليم چيو ته هن قدم استادن جي آواز کي پاليسي سازي جو حصو بڻائڻ ۾ اھم ثابت ٿيندو، جنهن جو سڌو فائدو استادن جي پيشاورانه ترقي ۽ سندن مسئلن جي مؤثر حل جي صورت ۾ سامهون ايندو. هن وڌيڪ چيو ته “شفاف ۽ جوابده نظام سان ئي مسئلن جي درست نشاندهي ۽ انهن جي حل کي يقيني بڻائي سگهجي ٿو.” هيلپ لائين ذريعي ملندڙ تجويزون STEDA بورڊ ۾ پيش ڪيون وينديون ته جيئن استادن جي سڌي نمائندگي کي پاليسي جو حصو بڻائي سگهجي.
