اسلام آباد: (بيورو رپورٽ) اسلام آباد هاءِ ڪورٽ سائفر ڪيس ۾ گرفتار پي ٽي آءِ چيئرمين عمران خان کي اڊيالا جيل منتقل ڪرڻ جو حڪم ڏئي ڇڏيو آهي.پي ٽي آءِ چيئرمين کي جيل سهولتن بابت درخواست تي ٻڌڻي چيف جسٽس اسلام آباد هاءِ ڪورٽ عامر فاروق ڪئي. ٻڌڻي دوران چيف جسٽس اسلام آباد هاءِ ڪورٽ ريمارڪس ڏنا ته پي ٽي آءِ چيئرمين سائفر ڪيس ۾ انڊر ٽرائيل قيدي آهي ۽ اسلام آباد جا سمورا انڊر ٽرائيل قيدي اڊيالا جيل ۾ هوندا آهن. انڊر ٽرائيل قيدي کي اڊيالا جي بجاءِ اٽڪ جيل ۾ ڇو رکيو ويو آهي؟ جسٽس عامر فاروق چيو ته توشه خانه ڪيس ۾ عمران خان کي اٽڪ جيل ۾ رکيو ويو هو، اها سزا معطل ٿي چڪي آهي. سڀاڻي جيڪڏهن اوهان کي رحيم يار خان ٽرانسفر ڪري ڇڏين ٿا ته ڇا اوهان اتان کان ٽرائيل ڪندو؟اسلام آباد هاءِ ڪورٽ ايڊيشنل اٽارني جنرل منور اقبال دوگل کان جواب طلب ڪري ورتو. چيف جسٽس اسلام آباد هاءِ ڪورٽ ريمارڪس ڏنا ته قانون موجب اسلام آباد جي انڊر ٽرائيل قيدي کي اڊيالا جيل ۾ هجڻ گهرجي. پي ٽي آءِ چيئرمين کي اڊيالا جيل شفٽ ڪريو.جسٽس عامر فاروق چيو ته ٻڌايو ويو هو ته هاڻ جيل ۾ اي بي ۽ سي ڪلاس ختم ٿي وئي آهي. عمران خان جي وڪيل بيرسٽر سلمان صفدر چيو ته هاڻ جيل ۾ عام ۽ بهتر ڪلاس هوندي آهي، عمران خان بهتر ڪلاس جو حقدار آهي جنهن تي جسٽس عامر فاروق چيو اها ڳالهه طئي ٿيل آهي ته پي ٽي آءِ چيئرمين بهتر ڪلاس جو حقدار آهي. پي ٽي آءِ چيئرمين اڳوڻو وزيراعظم ۽ پڙهيل لکيل شخص آهي جيل روز موجب هو جن شين جو حقدار آهي ان کي ملڻ گهرجي. ائين نه هجڻ گهرجي ته پي ٽي آءِ چيئرمين جا حق تلف ڪيا وڃن.
