ڪراچي (اسٽاف رپورٽر) سنڌ ايجوڪيشن فائونڊيشن (SEF) صوبي اندر 10 لک شاگردن جي داخلا جو اهم ۽ تاريخي انگ پار ڪري ورتو آهي. سنڌ جي تعليم ۽ خواندگي واري وزير ۽ SEF جي بورڊ آف گورنرز جي نائب چيئرمين سيد سردار علي شاهه اهڙي ڪاميابي کي “قابلِ فخر” قرار ڏيندي SEF جي پوري ٽيم کي مبارڪباد ڏني. سيد سردار علي شاهه چيو ته SEF هزارين ٻارن کي اسڪول کان ٻاهر رهجي وڃڻ کان بچايو آهي ۽ پٺتي پيل علائقن تائين تعليم جي رسائي کي وڌايو آهي. هن هدايت ڪئي ته SEF سان لاڳاپيل پارٽنر ادارا سبسڊي جي رقم جو گهٽ ۾ گهٽ 40 سيڪڙو استادن جي پگهارن تي خرچ ڪن جيئن تعليم جي معيار ۾ وڌيڪ بهتري اچي سگهي. وزير تعليم اهو پڻ اعلان ڪيو ته سنڌ اسڪول ايجوڪيشن اسڪالرشپ پروگرام (SSESP) تحت گهٽ ۾ گهٽ 50 سيڪڙو اسڪالرشپس ڇوڪرين لاءِ مخصوص ڪيون وينديون، جنهن سان تعليم ۾ صنفي برابري بابت حڪومت جي عزم کي وڌيڪ هٿي ملندي. ڪراچي ۾ سنڌ ايجوڪيشن فائونڊيشن جي هيڊ آفيس جي دوري کان پوءِ ٿيل اجلاس جي صدارت ڪندي وزير تعليم چيو ته سنڌ جي تعليمي پاليسين تي عملدرآمد لاءِ سمورا وسيلا استعمال ۾ آندا ويندا. هن ٽيڪنالاجي تي ٻڌل مانيٽرنگ، ڇوڪرين لاءِ سهولتن ۾ واڌ ۽ ڪوالٽي اشورنس جي نظام کي وڌيڪ مضبوط بڻائڻ جون به هدايتون جاري ڪيون. ان موقعي تي سنڌ ايجوڪيشن فائونڊيشن جي مينيجنگ ڊائريڪٽر گهنور علي لغاري، وزير تعليم کي فائونڊيشن جي جاري ۽ ايندڙ منصوبن بابت تفصيلي بريفنگ ڏني. هن مانيٽرنگ اينڊ ايوليئيشن (M&E) جي مضبوط نظام بابت ٻڌايو جنهن ۾ فيلڊ وزٽس جي تعداد وڌائڻ ۽ اسڪول سطح تي بهتري تي خاص ڌيان شامل آهي. هن SSESP تحت پڙهندڙ قابل شاگردن لاءِ ڪرايل “ويلنيس سروي” بابت به آگاهه ڪيو. هڪ منفرد سرگرمي طور وزير تعليم سيد سردار علي شاھ وڊيو لنڪ ذريعي لاڙڪاڻي جي ڏورانهين علائقي ۾ هلندڙ ڪلسٽر بيسڊ ٽيچر ٽريننگ سيشن سان سڌو رابطو ڪيو، جتي SEF حڪومتي پاليسي مطابق ارلي لرننگ ۽ فائونڊيشنل لرننگ ۾ 100 سيڪڙو استادن کي تربيت ڏئي رهيو آهي. وزير تعليم استادن سان سڌي گفتگو ڪئي، تربيت جي معيار جو جائزو ورتو ۽ شرڪت ڪندڙن کان سڌي راءِ پڻ ورتي. SEF جي پريزينٽيشن تي پنهنجا خيال ونڊيندي وزير تعليم مانيٽرنگ ۽ ايوليئيشن نظام کي جديد ٽيڪنالاجي ذريعي مڪمل طور خودڪار بڻائڻ جي هدايت ڪئي، جنهن ۾ فيشل ريڪگنيشن، بائيو ميٽرڪس ۽ جيو فينسنگ/جيو ٽيگنگ شامل آهن، ته جيئن شفافيت ۽ ڪارڪردگي ۾ واڌ آڻي سگهجي. شاگردن جي فلاح ۽ بهبود بابت ڳڻتي جو اظهار ڪندي هن هدايت ڪئي ته ٻارن ۾ نظر جي ڪمزوري جهڙن مسئلن جي حل لاءِ شاگردن جي اکين جي مفت جانچ لاءِ معياري آپريٽنگ طريقيڪار (SOPs) تيار ڪيا وڃن، جيڪي پارٽنر ادارن ذريعي مهيا ڪيا وڃن. وزير تعليم ٻڌايو ته سنڌ ۾ 200 کان وڌيڪ يونين ڪائونسلون اهڙيون آهن جتي پوسٽ پرائمري تعليمي سهولتون موجود ناهن ۽ تجويز ڏني ته نون اسڪولن جي قيام وقت انهن علائقن کي ترجيح ڏني وڃي. هن اها پڻ خاطري ڪرائي ته هو ايندڙ مالي سال ۾ SEF جي بجيٽ ۾ واڌ جي پڻ سفارش ڪندو. آخر ۾ هن پارٽنر اسڪولن وچ ۾ “پير ريويو ميڪنزم” متعارف ڪرائڻ جي تجويز ڏني، جنهن تحت هڪ اسڪول جا استاد ٻئي اسڪول جو جائزو وٺندا. سندس چوڻ موجب اهڙي نظام سان تعميري موٽ، لڳاتار بهتري ۽ اسڪولن وچ ۾ صحتمند مقابلي کي هٿي ملندي.
