ڪراچي (اسٽاف رپورٽر)سنڌ جي سينئر وزير شرجيل ميمڻ چيو آهي ته سنڌ حڪومت ڪراچي کي پاڪستان جو سڀ کان وڌيڪ ترقي يافته شهر بڻائڻ لاءِ پرعزم آهي، ۽ ڪراچي جي روڊن ۽ ٽرئفڪ کي بهتر بڻائڻ لاءِ 194 ارب رپيا سيڙپڪاري ڪئي آهي.شرجيل انعام ميمڻ پنهنجي بيان ۾ چيو آهي ته اهي ڪراچي جي ترقي لاءِ ڏينهن رات ڪم ڪري رهيا آهن، ڪراچي جي ترقي سنڌ حڪومت جي اولين ترجيح آهي. سنڌ حڪومت ڪراچي جي انفراسٽرڪچر، تعليم، صحت ۽ ٻين اهم شعبن تي ڪم ڪري رهي آهي.شرجيل ميمڻ جو چوڻ آهي ته اهي چاهين ٿا ته ڪراچي کي هڪ جديد، پائيدار ۽ جامع شهر بڻايو وڃي، ۽ ٽرئفڪ سسٽم کي بهتر بڻائڻ لاءِ شاهراهه ڀٽو، ملير ندي پل ۽ مختلف انڊر پاسن تي ڪم جاري آهي. شاهراهه ڀٽو، ملير ندي پل، انڊر پاس ۽ فلائي اوور جا منصوبا ٽرئفڪ جو دٻاءُ گهٽائيندا.هن وڌيڪ چيو ته ڪراچي ۾ اهم منصوبن تي ڪم مارچ تائين شروع ٿي ويندو، ۽ ڪم دوران معيار ۽ وقت جي پابندي کي يقيني بڻايو ويندو.شرجيل انعام ميمڻ جو چوڻ آهي ته ڪراچي ۽ ٻين وڏن شهرن ۾ 9 ضلعي هيڊ ڪوارٽر اسپتالن کي وڌايو ويندو ۽ ميڊيڪل ڪاليج قائم ڪيا ويندا.هن اهو به چيو ته اسان چاهيون ٿا ته ڪراچي جا شهري هر شعبي ۾ ترقي ۽ تبديلي محسوس ڪن. هر منصوبو ڪراچي وارن جي زندگين ۾ بهتري، سهولت ۽ خوشحالي آڻڻ لاءِ آهي.
