ڪراچي: (اسٽاف رپورٽر) شهر جي مختلف علائقن ۾ هڪ ڪلاڪ اندر ٽي ٽرئفڪ حادثا پيش آيا آهن.ريسڪيو اختيارين موجب، حادثن ۾ هڪ عورت سميت ٽي ماڻهو مارجي ويا، جڏهن ته هڪ عورت سميت ٽي ماڻهو زخمي ٿيا.ڪورنگي سنگر چورنگي ويجهو پاڻي جي ٽينڪر جي ٽڪر ۾ هڪ عورت فوت ۽ ٻي عورت زخمي ٿي پئي. واقعي کانپوءِ ٽينڪر ڊرائيور موقعي تان فرار ٿي ويو. رينجرز فرار ٿيندڙ ٽينڪر ڊرائيور کي گرفتار ڪري ورتو.ڊرائيور جي سڃاڻپ فقير محمد جي نالي سان ٿي، ۽ ان تي عوام پاران تشدد پڻ ڪيو ويو.واقعي ۾ فوت ٿيل عورت جي سڃاڻپ زبيده خانم جي نالي سان ٿي، جيڪا محمد حسين جي زال هئي، ۽ زخمي عورت جي سڃاڻپ محمد حسين جي ڌيءَ جي نالي سان ٿي. فوت ٿيل ۽ زخمي عورتون ماءُ ۽ ڌيءَ آهن.ٻيو واقعو شاهراهه فيصل عوامي مرڪز جي ويجهو پيش آيو، جتي هڪ موٽرسائيڪل سوار نامعلوم گاڏي جي ٽڪر ۾ مارجي ويو. حادثي ۾ ٻه ماڻهو زخمي پڻ ٿيا. فوت ٿيل جي سڃاڻپ خالد جي نالي سان ٿي آهي، جڏهن ته زخمين ۾ عبدالحڪيم ۽ واجد شامل آهن.ٽيون واقعو ميونسپلٽي نمبر 04 جي ويجهو پيش آيو، جتي هڪ لنگهندڙ نامعلوم گاڏي جي ٽڪر ۾ فوت ٿي ويو. فوت ٿيل جي سڃاڻپ 75 سالن جي عمر رضا جي نالي سان ٿي آهي. لاشن ۽ زخمين کي اسپتال منتقل ڪيو ويو آهي.
