ڪراچي )اسٽاف رپورٽر)ڪراچي جي ناظم آباد علائقي ۾ قادري هائوس تي ايس آءِ يو پوليس جي ڇاپي ۾ ڪيترائي ماڻهو گرفتار ڪيا ويا ۽ هٿيار هٿ ڪيا ويا.ڇنڇر جي رات ايس آءِ يو پوليس ناظم آباد ۾ واقع قادري هائوس تي ڇاپو هنيو. پوليس موجب، ڀتا خوري ۽ فائرنگ ۾ ملوث جوابدارن کي گرفتار ڪرڻ لاءِ ڇاپو هنيو ويو.آپريشن دوران 12 کان وڌيڪ ماڻهن کي حراست ۾ ورتو ويو ۽ ننڍا ۽ وڏا هٿيار ۽ گوليون جا ميگزين هٿ ڪيا ويا.پوليس موجب، جمشيد ڪوارٽرز ۾ ڀتا خوري ۽ فائرنگ جي ڪيسن ۾ گرفتار جوابدار ريحان جي اطلاع تي ڇاپو هنيو ويو، جتان جواد قادري عرف خواجه، شاهزيب ملا سميت ڪيترن ئي ماڻهن کي گرفتار ڪيو ويو.جڏهن ته سني تحريڪ جي ترجمان موجب، ثروت اعجاز قادري کي به ڪجهه وقت حراست ۾ رکڻ کان پوءِ آزاد ڪيو ويو.ايس ايس پي ايس آءِ يو عمران خان موجب، جوابدار مذهبي جماعت جي پليٽ فارم تان ڀتا خوري ۾ ملوث هئا ۽ انهن جي قبضي مان وڏي مقدار ۾ هٿيار هٿ ڪيا ويا.ٻئي طرف قادري هائوس جي قيادت پوليس جي ڪارروائي کي چار ديواري جي تقدس جي خلاف ورزي قرار ڏنو، هٿيارن کي لائسنس يافته ۽ قانوني قرار ڏنو ۽ چيو ته جيڪڏهن ڪو به ڏوهه ۾ ملوث هجي ها ته پاڻ قانون لاڳو ڪندڙ ادارن سان تعاون ڪري ها.قادري هائوس تي پوليس ڪارروائي کان پوءِ ثروت اعجاز قادري پريس ڪانفرنس ڪندي چيو ته منهنجي خاندان جي توهين ڪئي وئي آهي، اسان هميشه دهشتگردي جي مذمت ڪئي آهي ۽ قربانيون ڏنيون آهن، اسان مطالبو ڪريون ٿا ته هن ڇاپي ۾ ملوث پوري ٽيم خلاف ڪارروائي ڪئي وڃي، ٻي صورت ۾ ملڪ ڀر ۾ احتجاج ٿيندا.
