اسلام آباد (بيورو رپورٽ)وفاقي حڪومت مهانگائي جو سالياني هدف حاصل ڪرڻ ۾ ناڪام ٿي وئي، مالي سال 2023-24 ۾ ملڪ ۾ سراسري مهانگائي 23.41 سيڪڙو هئي جڏهن ته مالي سال 2023-2024 لاءِ مهانگائي جو سالياني هدف 21 سيڪڙو مقرر ڪيو ويو هو.شماريات جي وفاقي بيورو مهانگائي بابت پنهنجي ماهوار رپورٽ جاري ڪري ڇڏي آهي، جنهن ۾ چيو ويو آهي ته جون ۾ مهانگائي جي شرح ۾ 0.46 سيڪڙو اضافو ٿيو. موجب شماريات واري اداري جي رپورٽ ۾ چيو ويو آهي ته جون ۾ مهانگائي جي شرح 12.57 سيڪڙو هئي ۽ مئي 2024ع ۾ مهانگائي جي شرح 11.76 سيڪڙو هئي.رپورٽ موجب جون دوران شهرن ۾ مهانگائي جي شرح 0.58 سيڪڙو جڏهن ته ڳوٺن ۾ 0.28 سيڪڙو وڌي وئي، مالي سال 2023-24 دوران شهرن ۾ مهانگائي جي شرح 24.12 سيڪڙو رهي.شماريات واري اداري جي رپورٽ ۾ چيو ويو آهي ته گذريل مالي سال ڳوٺن ۾ مهانگائي جي شرح 22.41 سيڪڙو رڪارڊ ڪئي وئي هئي.ياد رهي ته 3 جون تي جاري ڪيل رپورٽ ۾ چيو ويو هو ته ملڪ ۾ مهانگائي ۾ 3.24 سيڪڙو جي گهٽتائي رڪارڊ ڪئي وئي هئي، جنهن کانپوءِ مئي ۾ مهانگائي جي شرح 11.76 سيڪڙو ٿي وئي هئي.رپورٽ ۾ چيو ويو آهي ته مئي ۾ آلو 14.73 سيڪڙو، گوشت 4 سيڪڙو ۽ لوبيا 3.9 سيڪڙو، ٽماٽر، پياز 51 سيڪڙو، مرغي 35.2 سيڪڙو ۽ ڪڻڪ جي قيمت ۾ 22.7 سيڪڙو اضافو ٿيوشماريات بيورو جي رپورٽ موجب مئي ۾ مائع ٻارڻ 9.4 سيڪڙو، بجلي جي قيمتن ۾ 4.5 سيڪڙو ۽ موٽر فيول 3.18 سيڪڙو سستو ٿيو. جڏهن ته هڪ سال ۾ بجليءَ جي قيمتن ۾ 58.7 سيڪڙو اضافو رڪارڊ ڪيو ويو، ٽرانسپورٽ سروسز ۾ 32.2 سيڪڙو ۽ سوٽي ڪپڙن جي قيمتن ۾ هڪ سال ۾ 23.2 سيڪڙو اضافو ٿيو.
