ڪراچي(اسٽاف رپورٽر)گرين آئلينڊ يوٿ فورم پاران سال 2009ع کان هي راندين جو ميلو منعقد ڪيو پيو وڃي، جنهن جو مقصد سماج جي نوجوانن ۾ لڪل صلاحيتن کي اجاگر ڪرڻ، سندن خوداعتمادي وڌائڻ ۽ کين صحتمند ۽ هاڪاري سرگرمين ۾ مصروف رکڻ آهي.
هي دلچسپ راندين جو ميلو جمعي، 18 سيپٽمبر کان ڇنڇر، 10 آڪٽوبر 2026ع تائين ڪراچيءَ جي مشهور راندين واري هنڌ ڪي ايم سي اسپورٽس ڪمپليڪس، ڪشمير روڊ تي منعقد ڪيو ويو.
هن ميلي ۾ ڪرڪيٽ جي فائنل ۽ پڄاڻيءَ واري تقريب ڇنڇر، 10 آڪٽوبر تي ڪي ايم سي اسپورٽس ڪمپليڪس، ڪشمير روڊ، ڪراچيءَ ۾ منعقد ڪئي ويندي، جنهن ۾ ڪراچيءَ جو ميئر مرتضيٰ وهاب خاص مهمان هوندو. ان موقعي تي ملڪ جي مشهور ٽي وي چئنل اي آر واءِ جي سينيئر اينڪر پرسن ۽ صحافت جي دنيا جي نامور شخصيت وسيم بادامي پڻ شرڪت ڪندو.
ان کان علاوه تقريب ۾ ڪراچيءَ جون مشهور سماجي ۽ ڪاروباري شخصيتون پڻ مهمان طور شرڪت ڪنديون، جن ۾ ايڊووڪيٽ جنرل حسن اڪبر، محمد منير خاناڻي، عباس بادامي، محمد راجپر، اقبال جيواني، حاجي لياقت ۽ سلمان نقوي شامل آهن.
هن راندين جي ميلي ۾ ڪرڪيٽ ۽ فٽبال کانسواءِ ترڻ، نائن بال، ٽيبل ٽينس، بيڊمنٽن ۽ مختلف بورڊ گيمز جا مقابلا پڻ منعقد ڪيا پيا وڃن. ان سال ٻن نين راندين، پيڊل ۽ 15 سالن کان گهٽ عمر وارن ٻارن جي انڊور ڪرڪيٽ کي به ميلي ۾ شامل ڪيو ويو آهي.
گذريل ٻن سالن کان نوجوان ڇوڪرن سان گڏ ڇوڪرين ۽ عورتن لاءِ به مختلف راندين جا مقابلا منعقد ڪيا پيا وڃن. هن ڀيري لڳ ڀڳ هڪ هزار کان وڌيڪ ٻار، ڇوڪرا، ڇوڪريون، مرد ۽ عورتون انهن راندين جي مقابلن ۾ حصو وٺندا.
ضرورت ان ڳالهه جي آهي ته اهڙيون هاڪاري سرگرميون منعقد ڪري سڄي ملڪ جي نوجوانن کي تعليمي سرگرمين سان گڏ غير نصابي سرگرمين، خاص طور راندين جي مقابلن ۾ حصو وٺڻ ۽ پنهنجي صلاحيتن جو مظاهرو ڪرڻ جا موقعا فراهم ڪيا وڃن.
ان مقصد کي حاصل ڪرڻ ۽ نوجوانن کي صحتمند سماج جا ڪارائتا فرد بڻائڻ لاءِ خانگي توڙي سرڪاري ادارن کي پنهنجو پنهنجو ڪردار ادا ڪرڻ گهرجي.
