پشاور (ڊيسڪ نيوز) خيبرپختونخوا صوبي جي بم ڊسپوزل اسڪواڊ ۾ نوڪري ڪندڙ اهلڪار عنايت الله ٽائيگر بابت ٺهيل دستاويز فلم ”آرمڊ ود فيٿ“ کي ايمي ايوارڊ ڏنو ويو آهي. اسد فاروقي پاران تيار ڪيل فلم کي حڪومت ۽ سياست جي ڪيٽيگريءَ ۾ ايوارڊ ڏنو ويو آهي.
دستاويزي فلم ۾ ڏيکاريو ويو آهي ته ڊيرا اسماعيل خان جي رهائشي عنايت الله ٽائيگر زندگي ڪيئن گذاري ٿو ۽ هن ڪهڙا ڪارناما سرانجام ڏنا آهن. عنايت الله تائيگر 06 ڀيرا بارودي مواد ۽ خودڪش حملن جي وڪڙ ۾ اچڻ سبب شديد زخمي ٿيندو رهيو آهي. سال 2000 کان هن وقت تائين هن 297 ديسي ساخت جا بم، 350 بارودي سرنگون ۽ 25 سو جي لڳ ڀڳ ٻيو بارودي مواد ناڪاره بڻايو آهي. بي بي سي اردوءَ پاران عنايت الله ٽائيگر بابت لکيل فيچر ۾ ٻڌايو ويو آهي ته هڪ بارودي سرنگ کي ناڪاره بڻائيندي عنايت الله جي کٻي ٽنگ ضايع ٿي وئي. جڏهن ته ٻيو سندس هٿ شديد زخمي ٿيو. هڪ خودڪش حملي ۾ سندس ساٿي مارجي ويا جڏهن ته عنايت الله جي ڪلهي، ڪنڌ ۽ چهري تي گهرا زخم آيا ۽ سندس هڪ هٿ ڪٽجي ويو. عنايت الله ٻڌايو آهي ته ”نماز پڙهڻ وقت ئي صرف شلوار قميض پائيندو آهيان نه ته هر وقت وردي پايون ويٺو هوندو آهيان“.
ساڳي شهر ۾ گهر ۽ آفيس هجڻ باوجود پنهنجي گهر ناهي ويندو ۽ سال ۾ هڪ يا ٻه ڀيرا گهر جو چڪر هڻندو آهي باقي ٻارن ۽ گهرواريءَ سان روزانو فون تي ڳالهه ٻولهه ڪندو آهي. واضح رهي ته ايمي ايوارڊ فلم سازيءَ جي دنيا جو هڪ وڏو ۽ اهميت وارو ايوارڊ آهي. جيڪي هر سال آمريڪا ۾ هڪ وڏي تقريب ۾ ڏنا ويندا آهن.
(بي بي سيءَ جي ٿورن سان)
