ڪراچي(اسٽاف رپورٽر)سنڌ هاءِ ڪورٽ ڪراچي جي علائقي لياقت آباد ۾ رينجرز اهلڪار دلدار جي قتل ڪيس جي جاچ آفيسر کان رڪارڊ طلب ڪري ورتو.ايم ڪيو ايم جي ڪارڪن عبيد ڪي ٽو جي ضمانت واري درخواست جي ٻڌڻي دوران اسپيشل پبلڪ پراسيڪيوٽر رانا خالد ٻڌايو ته جوابدار عبيد ڪي ٽو جي خلاف دهشتگردي ٽوڙ عدالت ۾ ٽرائل جاري آهي.اسپيشل پبلڪ پراسيڪيوٽر رانا خالد حسين عدالت کي ٻڌايو ته ڪيس جو اهم شاهد رينجرز اهلڪار رٽائرڊ ٿي ويو آهي، گذريل ٻڌڻي ۾ دير ٿيڻ سبب شاهد جو بيان رڪارڊ نه ٿي سگهيو.هن چيو ته 9 آڪٽوبر تي جوابدار عبيد خلاف شاهد جو بيان رڪارڊ ٿيڻ جو امڪان آهي.اسپيشل پبلڪ پراسيڪيوٽر رانا خالد حسين عدالت کي استدعا ڪئي ته شاهد جو بيان رڪارڊ ٿيڻ تائين ضمانت واري درخواست جي ٻڌڻي ملتوي ڪئي وڃي.بعد ۾ عدالت جوابدار عبيد جي ضمانت واري درخواست جي ٻڌڻي 2 هفتن لاءِ ملتوي ڪري ڇڏي.پوليس موجب جوابدار 1998ع ۾ پنهنجي ساٿين سان گڏجي لياقت آباد ۾ فائرنگ ڪري رينجرز اهلڪار دلدار کي قتل ڪيو هو.
