ڪراچي(اسٽاف رپورٽر) سنڌ هاءِ ڪورٽ جي چيف جسٽس احمد علي شيخ جي سربراهي ۾ ڊويزن بئنچ ڪرپشن جي الزام ۾ ملوث ڪي ايم سي جي ڊائريڪٽر مسعود عالم خلاف انڪوائري بابت نيب ڪراچي جي ڊائريڪٽر جنرل کان 26 فيبروري تي انڪوائري رپورٽ طلب ڪندي کيس ايندڙ ٻڌڻي تائين گرفتار نه ڪرڻ جو حڪم ڏنو آهي. اهڙي هڪ ٻئي ڪيس ۾ ايم پي اي علي غلام نظاماڻي خلاف غير قانوني اثاثا ٺاهڻ بابت شروع ڪيل انڪوائري جي رپورٽ چئن هفتن اندر پيش ڪرڻ جو حڪم ڏيندي علي غلام نظاماڻي جي گرفتاري کان اڳ واري ضمانت ۾ ايندڙ ٻڌڻي تائين واڌ ڪري ڇڏي آهي. عدالت ٻنهي ڪيسن جي ڌار ڌار ٻڌني دوران حڪم جاري ڪيا. عدالت ڪي ايم سي جي ڊائريڪٽر مسعود عالم پاران گرفتاري کان اڳ واري ضمانت لاءِ داخل ڪيل درخواست جي ٻڌڻي ڪئي ته نيب پراسيڪيوٽر پاران عدالت کي ٻڌايو ويو ته درخواست گذار خلاف ڪرپشن بابت شڪايتون مليون آهن جنهن خلاف انڪوائري شروع ڪرڻ لاءِ نيب جي هيڊ آفيس اسلام آباد کي لکيو ويو آهي . هن چيو ته مسعود عالم تمام وڏي مافيا جو فرنٽ مين آهي. ان موقعي تي درخواستگذار مسعود عالم جي وڪيل عدالت کي ٻڌايو ته مسعود عالم پرڏيهه وڃي رهيو هو ته اميگريشن عملدارن کيس ايئرپورٽ تي روڪي ورتو هو جنهن تي عدالت چيو ته مسعود عالم پرڏيهه ڇا ڪرڻ وڃي رهيو هو؟ جنهن تي درخواستگذار جي وڪيل چيو ته مسعود عالم جو ڪٽنب 20 سالن کان پرڏيهه ۾ ترسيل آهي جنهن تي عدالت چيو ته اڇا هي هتي رهجي ويو آهي ۽ ڪراچي مان پئسا ڪمائي موڪليندو هوندو؟ جنهن تي جوابدار جي وڪيل چيو ته مسعود عالم ٻه شاديون ڪيون آهن جنهن ڪري هو سال ۾ ٻه ٽي ڀيرا پرڏيهه ويندو رهندو آهي جنهنڪري سندس ضمانت منظور ڪرڻ سان گڏ کيس پرڏيهه وڃڻ جي اجازت به ڏني وڃي جنهن تي عدالت نيب ڪراچي جي ڊائريڪٽر جنرل کي ڪي ايم سي جي ڊائريڪٽر مسعود عالم خلاف ڪرپشن بابت انڪوائري رپورٽ 26 فيبروري تي پيش ڪرڻ جي هدايت ڪندي ايندڙ ٻڌڻي تائين کيس گرفتار نه ڪرڻ جو حڪم ڏنوآهي. هوڏانهن ايم پي اي علي غلام نظاماڻي خلاف غير قانوني اثاثا ٺاهڻ بابت ڪيس جي ٻڌڻي شروع ٿي ته عدالت چيو ته انڪوائري جي رپورٽ چئن هفتن اندر پيش ڪئي وڃي. ٻڌڻي دوران ايم پي اي علي غلام نظاماڻي پنهنجي وڪيل سان گڏ عدالت ۾ پيش ٿيو ته چيف جسٽس احمد علي شيخ ان کان پڇيو ته اوهان ڪيترا ڀيرا سنڌ اسيمبلي ميمبر چونڊيا ويا آهيو؟ جنهن تي علي غلام نظاڻي چيو ته ٽيون ڀيرو سنڌ اسيمبلي ميمبر چونڊيو آهيان. عدالت پڇيو ته ايم پي اي فنڊ مان علائقي ۾ ڪيترا ترقياتي ڪم ڪرايا آهن؟، ڪيترا اسڪول ۽ اسپتالون جوڙايون آهن؟ جنهن تي علي غلام نظاماڻي چيو ته ٿر ۾ اسڪول جوڙايا آهن؟ جنهن تي چيف جسٽس چيو ته چونڊجي سانگهڙ مان اچو ٿا ۽ اسڪول وري ٿر ۾ ٺاهڻ جي دعويٰ ڪري رهيا آهيو؟. ڇا سانگهڙ ۾ رڳو دروازا ٺهرايا آهن؟ اها ڪارڪردگي آهي اوهان جي؟. ان موقعي تي نيب پراسيڪيوٽر عدالت کي ٻڌايو ته هن وقت تائين انڪوائري ۾ علي غلام نظاماڻي جي 386 ايڪڙ زمين ۽ 25 بئنڪ اڪائونٽس جو پتو لڳايو ويو آهي. علي غلام نظاماڻي خلاف جاچ هلندڙ آهي جنهنڪري جاچ مڪمل ڪرڻ لاءِ وڌيڪ مهلت ڏني وڃي جنهن تي عدالت نيب کان علي غلام نظاماڻي خلاف هلندڙ جاچ جي رپورٽ طلب ڪندي سندس گرفتاري کان اڳ ضمانت ۾ پڻ چئن هفتن جي واڌ ڪري ڇڏي آهي.
