طالبان تي ڀارتي قونصل خانن جي تلاشي جو الزام

نئين دهلي(ويب ڊيسڪ) ڀارتي ميڊيا افغان ذريعن جي حوالي سان دعويٰ ڪئي آهي ته طالبان جي طرفان قنڌار ۽ هرات ۾ بند پيل ڀارتي قونصل خانن جي تلاشي ورتي وئي جنهن جو مقصد اهم دستاويز هٿ ڪرڻ هو. ميڊيا موجب طالبان ڀارتي قونصل خانن ۾ پارڪ ڪيل گاڏيون به پاڻ سان گڏ ڪاهي ويا پر نه پيو ٻڌايو وڃي ته طالبان پاڻ سان گڏ دستاويز به کڻي ويا آهن. ڀارتي ميڊيا جي دعويٰ  آهي ته طالبان جي طرفان ڪابل جو ڪنٽرول حاصل ڪرڻ کانپوءِ افغان انٽيلي جنس ايجنسي اين ڊي ايس جي لاءِ ڪم ڪرڻ وارن جي تلاشي جي لاءِ گهر گهر چيڪنگ جاري آهي. گڏيل قومن جي نمائندي پاران افغان انٽيليجنس اهلڪارن جي گهر گهر تلاشي جاري آهي. واضح رهي ته افغانستان ۾ ڀارتي سفارتخاني کان علاوه مزار شريف، هرات ۽ قنڌار ۾ قونصل خانه به ڪم ڪر رهيا هئا پر ڪابل جو ڪنٽرول طالبان جي هٿن ۾ ايندي ئي ڀارت افغانستان ۾ پنهنجو سفارتي مشن بند ڪري عملي کي واپس گهرايو هو. ياد رهي ته ٻه ڏينهن اڳ طالبان جي طرفان ڀارتي سفارتي عملي کي افغانستان کان نڪرڻ ۾ مدد فراهم ڪرڻ جي وڊيو به سامهون آئي هئي.

پهنجو تبصرو موڪليو