سيٺ دائود پاران ڪرونا متاثرين لاءِ هڪ ارب جي امداد

اسلام ڪوٽ (صادق بجير) پاڪستان جي وڏي صنعتڪار حسين دائود پاران پاڪستان ۾ ڪرونا وائرس خلاف ويڙهه لاءِ هڪ ارب روپين جي امداد ڏيڻ جو اعلان ڪيو ويو آهي. اهڙو اعلان اينگرو ڪارپوريشن، ، دائود هرڪيوليس ، دائود فائونڊيشن ۽ حسين دائود جي ڪٽنب پاران جاري ٿيل هڪ پڌرائي ۾ ڪيو ويو آهي. اها امداد پاڪستان ۾ مجموعي طور تي ڪرونا وائرس خلاف ننڍي، وچولي ۽ ڊگهي مدي لاءِ اعلان ڪئي ويئي آهي ۽ انهي کي ڪرونا وائرس کان بچاءُ، ٽيسٽنگ ۽ طبي چڪاس، ڪرونا خلاف پهرين صف ۾ وڙهندڙ طبي عملي جي تحفظ لاءِ ضروري سامان جي فراهمي، مريضن جي سارسنڀال ۽ ڪرونا سبب متاثر غريب خاندانن جي سهائتا جي مد ۾ خرچ ڪئي ويندي. پڌرائي ۾  حسين دائود چيو آهي ته اسان هن ڏکئي وقت ۾ ڪرونا خلاف جنگ ۾ قوم سان گڏ بيٺل آهيون ۽ اهو اسان تي فرض آهي ته اسان ماڻهن جي مدد ڪريون. هن چيو ته اهو اسان جي ڪاروبار جو بنيادي  قدر ۽ اصول به آهي ته پنهنجي ماڻهن جي ڏکئي گهڙي ۾ مدد ڪئي وڃي. حسين دائود حڪومت ۽ ٻين ساک رکندڙ ادارن جي ڪوششن جي واکاڻ ڪندي چيو ته اهي هن چيلنج کي منهن ڏيندي پاڻ پتوڙي رهيون آهن ۽ اسان سندن ڪم کي اڳتي وڌائيندي سندن سهڪاري بڻجي رهيا آهيون. هن دعا ڪئي ته الله اسان کي هن آزمائش مان ڪاميابي سان آجو ڪندي سرخرو ڪندو.

پهنجو تبصرو موڪليو